د محکمې پر کارکوونکو د برید پړه طالبانو ومنله
وسله والو طالبانو د یوې خبرپاڼې په خپرولو سره د هغه برید پړه ومنله چې نن سهار یې د کابل لوېدیځ، باغ داوود سیمه کې د وردګو ولایت اړوند د محکمې د کارکوونکو موټر په نښه کړ.
د کورنیو چارو وزارت د وینا له مخې، په دغه برید کې لس تنه وژل شوي او څلور نور ټپیان دي.
وسله والو طالبانو د برید د پړې منلو سره ویلي چې ۲۲تنه قاضیان او څارنوالان چې میدان وردګو ته پر لار و، وژل شوي او ټپیان شوي.
طالبانو ویلي، د قاضیانو موټر یې د خپلو هغو شپږو تنو ملګرو د اعدام په غبرګون کې په نښه کړ چې څه موده مخکې په کابل کې په دار وځړول شول. طالبانو ګواښ کړی و چې د عدلي ارګانونو کارکوونکي به په نښه کوي.
طالبان داسې مهال دا برید ترسره کوي چې نن دغې ډلې مولوي هبت الله اخوندزاده د خپل نوي مشر په توګه وټاکه. د اخوندزاده په اړه ویل کېږي چې په شرعي مسئلو کې تر نورو طالبانو توندلاری دی.
