اسلاماباد: له افغانستان سره جګړه نه غواړو، د ډیپلوماسۍ دروازه پرانیستې ده
یوه ورځ وروسته له هغې چې د پاکستان د دفاع وزیر خواجه اصف ویلي وو، ښايي هېواد یې تر روژې مخکې پر افغانستان پوځي اقدام وکړي، د پاکستان د بهرنیو چارو وزارت ویاند طاهر اندرابي وایي، اسلاماباد له کابل سره د جګړې نیت نه لري.
اندرابي په اسلاماباد کې د اوونیزې خبري غونډې پر مهال څرګنده کړه چې پاکستان نه غواړي د دواړو «وروڼو هېوادونو» ترمنځ اړیکې خرابې شي او د ډیپلوماسۍ لاره وتړل شي. نوموړي ټینګار وکړ چې هېواد یې نه د ډیپلوماسۍ دروازه تړي او نه هم د جګړې دروازه پرانیزي.
هغه زیاته کړه: «ډیپلوماسي حتا د جګړو پر مهال هم روانه وي، او د نښتو پر وخت هم دوام لري.»
د دفاع وزیر وروستیو څرګندونو او د بهرنیو چارو وزارت د ویاند خبرو د دواړو هېوادونو ترمنځ د اړیکو په اړه بېلابېل غبرګونونه راپارولي، خو اسلاماباد هڅه کوي وښيي چې د تاوتریخوالي پر ځای د خبرو او تعامل لاره غوره بولي.
