سنگين: له سقوط وروسته امنيتي چارواکي او پوليس کلابند دي
وسله والو طالبانو له درنو جگړو وروسته پرون مازيگر د هلمند سنگين ولسوالۍ ونيوله.
د امنيه قوماندانۍ چارواکو رسنيو ته ويلي، د ولسوالۍ ودانۍ او امنيه قوماندانۍ طالبانو نيولي او يو شمېر پوليس او امنيتي چارواکي ولسوالۍ ته څېرمه يوه سرای کې د طالبانو له لوري کلابند دي.
په داسې حال کې چې د هلمند د ولايتي شورا غړي او نور چارواکي د سنگين د سقوط خبره کوي، د والي وياند عمر ځواک دا خبره ردوي او وايي چې سنگين کې سخته جگړه روانه ده.
د سنگين د ټولنیزې شورا غړي غلام جان اکا تاييد کړې، چې طالبانو د ولسوالۍ ودانۍ، ښاروالۍ ودانۍ، سنگين بازار او نورې سيمې نيولې دي، او د سرتېرو جسدونه او ټپيان ورپاتې دي، هغه زياته کړې ده، د ولسوالۍ ټول نظامي تجهيزات، موټر او وسلې هم طالبانو له ځان سره وړي دي.
بل لور ته د هلمند مرستيال والي او د ولسي جرگې رييس عبد الرووف ابراهيمي د هلمند ولايت د سقوط وېره څرگنده کړې ده او له ولسمشر او نورو چارواکو يې غوښتي چې د ولايت حالات کنټرول کړي.
مرستيال والي محمد جان رسول يار تېره ورځ د جگړو په ترڅ کې د ۹۰ تنو سرتېرو د وژل کېدو پخلی هم کړی و.
همدا راز په ولسي جرگه کې د هلمند د خلکو استازو څرگنده کړې ده، چې که گرشک ولسوالۍ هم د طالبانو لاس ته پرېوځي، هرات، فراه او کندهار به له گواښ سره مخ شي.
وسله والو طالبانو رسنيو ته په استولي ايميل کې د سنگين د نيولو پخلی کړی او زياته کړې يې ده، چې لا هم هلته جگړه روانه ده.
