طالبانو د امریکا د ولسمشر ډونلډ ټرمپ هغه څرګندونو ته غبرګون ښودلی چې ویلي وو، امریکا په افغانستان خپل پوځي حضور راکموي، خو استخباراتي حضور به ولري.
د طالبانو د قطر د دفتر ویاند سهیل شاهین اریانا نیوز ته ویلي چې که امریکایان، د استخباراتي حضور تر څنګ، خپل پوځیان له افغانستانه و نه باسي، نو د سولې خبرې به لومړي حالت ته لاړې شي.
شاهین زیاته کړې “زموږ پالیسي روښانه ده، د خبرو له لارې د افغانستان اشغال پای ته رسول، خو که چېرې زموږ لاره او پالیسي و نه منل شي، نو پوځي لاره به ادامه پېداکړي.”
تر اوسه د طالبانو او امریکایانو تر منځ اته پړاوه خبرې شوي، خو لا هم کوم توافق ته نه دي رسېدلي.
تمه کېږي چې دواړه لوري به ژر نهم پړاو خبرې پېل کړي.
