روسيه: د امريکا له نوي ولسمشره د طالبانو غوښتنه پر ځای ده
روسيې د امريکا له نوي ولسمشره د افغان طالبانو غوښتنه ډېره پر ځای بللې ده. طالبانو پرون د يوې خبرپاڼې له لارې له ډونالډ ټرمپ نه وغوښتل، چې خپل ټول سرتېري دې له افغانستانه وباسي او افغانان دې پرېږدي، چې يو خپلواک نظام ولري.
د روسيې بهرنيو چارو وزارت د طالبانو له خبرپاڼې خپرېدو وروسته څرګنده کړه، چې مسکو له افغانستانه د بهرنيو ځواکونو د ويستلو په اړه د طالبانو غوښتنه ډېره پر ځای بولي.
د روسيې د بهرنيو چارو وزارت يوه چارواکي او کابل کې د ولسمشر پوتين ځانګړي استازي ضمير کابلوف په دې اړه وويل: «موږ په دې اند يو، چې د امريکا نوې اداره به افغانستان کې لا ښه او مناسب سياست پر مخ يوسي». نوموړي له افغانستانه د بهرنيو ځواکونو د وتلو په اړه د طالبانو غوښتنه سموونکې بللې ده.
هغه په خپلو خبرو کې وويل، چې له دې هر څه سره سره دې د امريکا نوی ولسمشر په دې پوی وي، چې د افغانستان د ستونزې اواری د روسيې او د ټولو سيمهييزو قدرتونو له ګډون پرته ناشونی دی.
روسيه په داسې حال کې دا څرګندونې کوي، چې د ټرمپ بريا ته خوشبينه او خوښه ده او هغه هم روسيې سره د ښو اړيکو وړاندوينه کړې ده. د امریکا نوي ولسمشر د ټاکنيزو کمپاينونو پر مهال ويلي وو، چې له روسيې سره به اړيکې نږدې کړي. د روسيې ولسمشر هم په خپلو خبرو کې د ډونالډ ټرمپ ستاينه کړې وه او هغه يې د بريا په صورت کې د امریکا يو مناسب ولسمشر بللی و.
خو دا چې ټرمپ به د طالبانو د دې غوښتنې او د روسيې مشورې ته څه ډول غبرګون وښيي، لا معلومه نه ده. کابل کې د امريکا سفير تېره ورځ د نوموړي له ولسمشر ټاکل کېدو وروسته وويل، چې امريکا به د افغانستان په اړه خپل نظر بدل نه کړي او «همکارۍ» ته به يې دوام ورکړي.
