د کابل په کارته سخي کې د شيعه گانو پر يوه زيارت د وسله والو په بريد کې لږ تر لږه څوارلس تنه وژل شوي او له څلوېښتو ډېر نور ټپيان دي.
کابل نيوز ليکلي، چې پينځو تنو وسله والو بريدگرو د امنيتي ځواکونو له يونفورمه په گټه اخيستو پر ياد زيارت بريد وکړ او دغه مرگ ژوبله يې پېښه کړه.
د کابل پوليس وايي، چې وسله والو لومړی د سخي زيارت محوطه کې پر خلکو ډزې وکړې او وروسته دغه جومات ته ننوتل او خلک يې يرغمل ونيول. جومات کې هغه شيعه گان راټول و، چې د حسين رضي الله عنه د شهادت په مناسبت يې په جوړو شويو مراسمو کې گډون کړی و.
د عامې روغتيا وزارت له پېښې وروسته خبر ورکړ، چې شاوخوا څلوېښت تنه ټپيان د کابل روغتونو ته لېږدول شوي دي، چې مېرمنې هم په کې دي.
له همدې بريد لږه شېبه وروسته د کابل په څلورمه کارته کې هم د «چهاريار» په نوم پر يوه جومات وسله والو بريد کړی. د کورنيو چارو وزارت صديق صديقي د دې بريد پخلی کړی خو د تلفاتو په اړه يې څه نه دي ويلي.
ولسمشرۍ ماڼۍ پر سخي زيارت بريد په کلکو ټکو غندلی او د ولسمشر غني له قوله يې ليکلي، چې ترورستي بريدونه د ديني، مذهبي او ملي مناسبتونو د لمانځلو خنډ نه شي گرځېدی.
د دغو بريدونو پړه تر دې دمه کومې وسله والې ډلې پر غاړه نه ده اخيستې.
