د حزب اسلامي افغانستان مشر ګلبدين حکمتيار په خپله نوي خپاره شوي پيغام کې د افغانستان اوسنی حکومت مزدور بللی او زياته کړې يې ده چې امريکا افغانستان اشغال کړی دی.
هغه دغه څرګندونې د ترکيې ولس ته د پوځي کودتا پر وړاندې د درېدو په اړه يوه پيغام کې کړې دي چې په شهادت ورځپاڼه کې خپره شوې ده. په ياد پيغام کې د حزب اسلامي مشر د ترکيې د ولس د کړنې د مبارکۍ او پرې شکرګذارۍ تر څنګ د افغانستان خلکو ته هم خپل پيغام استولی دی.
حکمتيار افغانانو ته ويلي چې د ترکيې د خلکو په د «مزدور حکومت» او «اشغال» پر وړاندې د ترکانو په څېر لاره غوره کړي. هغه ليکي «زه پر خپل ولس هم غږ كوم چي راشئ د پرديو او د هغوى د ذليلو او سپكو غلامانو د واكمنۍ پاى ته رسولو لپاره د خپلو تركي وروڼو لار غوره كړئ».
حکمتيار زياتوي: «يقيناً چي زما په سرلوړي ولس كي دا همت شته، په څلورو لسيزو كي ئې له دوو سترو زبرځواكونو سره ډغري ووهلې، كه تصميم ونيسي او د باهمته تركانو په څېر سړكونو ته راووځي هم به اشغال پاى ته ورسوي، هم به د اشغالگرانو په لاس تپل شوى مزدور حكومت نسكور كړي، هم به جگړہ پاى ته ورسوي».
د يادونې وړ ده چې لنډه موده وړاندې د حکمتيار او افغان حکومت تر منځ د سولې خبرې اترې وروسته له دې چې بريا ته ډېرې نږدې شوې وې، ناکامه شوې.
