افغان چارواکي د بروکسل له کنفرانس څخه د ډېرو مالي مرستو تمه کوي. د روانې میلادي میاشتي په څلورمې او پنځمې به د بروکسل په ښار کې د نړۍ د اویا هېوادونو په گډون د افغانستان د راتلونکي څلورو کلو په اړه غونډه وشي.
نن د یکشنبې په ورځې د بروکسل د غونډې په تړاو ولسي جرگې د بهرنیو چارو وزیر صلاح الدین رباني، د مالیې وزیر اکلیل حکیمي او د کډوالو د چارو وزیر عالمي بلخي ورغوښتي وو تر څو د غونډې په اړه توضیحات ورکړي.
حکیمي د ولسي جرگې غړو ته ډاډ ورکړ چې نړیوال ژمن دي چې له افغانستان سره مرسته وکړي او په دې اړه یې د مرستو ځینې شمېرې هم اعلان کړې. د حکیمي په وینا امریکا (۷۰۰)، جرمني (۴۵۰)، نړیوال بانک (۴۰۰)، د اسیا پراختیايي بانک (۳۰۵)، او هند به (۲۵۰) ملیونه ډالره مرسته اعلانوي.
تر دې مخکې ځینو پټو سندونو ښکاره کړې وه چې اروپايي اتحادیه له افغانستان سره د بروکسل په کنفرانس کې د مشروطې مرستې اخطار ورکړی خو لا په دې اړه نور څه نه دي ویل شوي.
