د ناټو د غړو هېوادونو مشرانو ویلي چې له افغانستان نه د خپلو پوځيانو د وېستلو لپاره کوم ځانگړی پلان نه لري. د ناټو چارواکو دا اعلان په داسې حال کې کړی چې تر دې دمه د امریکايي سرتېرو د کره شمېرې د پاتې کېدو په اړه هم امریکایانو څه نه دي ويلي.
د ناټو د نظامي کمېټې مشر پیتر پاویل په پروگسل کې رسنیو ته وویل چې د ناټو غړو هېوادونو تر منځ دا مشترک ټکی دی چې په افغانستان کې خپل سرتېري تر نامعلومې نېټې پورې پرېږدي.
پاویل زیاتوي چې د دې لپاره شرایط نه دي برابر شوي چې افغانستان اوسمهال پرېږدو او دا تصمیم نیول شوی دی.
ولسمشر اوباما غواړي چې په افغانستان کې د امریکايي سرتېرو شمېر له ۹۸۰۰ څخه ۵۰۰۰ ته راټیټ کړي خو تر دې دمه یې په دې اړه کوم اقدام نه دی کړی. د نظامي چارو کارپوهان په دې نظر دي چې ناټو د امریکایانو د پلان له عملي کولو وروسته د خپلو سرتېرو په اړه تصمیم نیسي.
د ناټو غړیو هېوادونو یو چارواکي پرون د چهارشنبې په ورځ وویل چې دوی لا هم د واشنگټن د پرېکړې منتظر دي چې هغوی د خپلو سرتېرو په اړه څه تصمیم نیسي وروسته له هغې به بیا ناټو پرېکړه وکړي.
