د نجم له مشر مدثر اسلامي سره د ځلاند پاڼې مرکه

ځلاند:نجم څه دی او څه ډول ترکيب لري؟

مننه.

نهاد جوانان مسلمان (نجم) په هیواد کې د ځوانانو تر ټولو ستره اسلامي ټولنه ده چې د ۱۳۹۰کال د کب میاشتې په ۱۹مه د بیلا بیلو ولایتونو د ځوانانو د استازو له لوري د یوې مشورتي غونډې په پای کې د خپلواکې ټولنې په توګه تاسیس شوه او په همدې نوم له عدلیې وزارت سره ثبت شوې ده. نجم له مرکزي او ولایتي ټیمونو جوړ دی. مرکزي ټیم چې د نجم رئیس یې مسئول دی تر ډیره بریده د ستراتیژي او پلان جوړونې دنده لري او د کارونو د سم تطبیق څارنه کوي. ولایتي ټیمونه او ساحوی ادارات د پلان د تطبیق اصلي واحدونه دي.پدې توګه نجم هڅه کوي په مناسب چوکاټ کې د مرکزي او غیر مرکزي مدیریت له لارې د کارونو اغیز ډیر کړي.

ځلاند:د جمعيت اصلاح او نجم ترمنځ اړيکه څه ډول ده؟ نجم د جمعيت اصلاح يوه برخه ده او که دواړه ځانونه ځان ته بولي؟

نجم له اداري پلوه بیله او خپلواکه ټولنه ده. د فکر او کار په برخه کې له ټولو اسلامي او ټولنیزو جریانونو سره د خپلو اهدافو او ارزښتونو په رڼا کې ګډ کار او همکاري کوي. د ځوانانو د دیني او فکري روزنې او توجیه په برخه کې د جمعیت اصلاح غړي او د جمعیت اصلاح له لوري چمتو شوي مواد زمونږ لپاره ستره تکیه ده چې پدې اړه مونږ له جمعیت اصلاح مننه کوو.

ځلاند:که ځانته ځانته وي نو د دواړو فرق څه دی؟ فکري اختلافات څه دي؟

زما د معلوماتو له مخې د جمعیت اصلاح او نجم ستر توپیر پدې کې دی چې جمعیت اصلاح د یوه ټولنیز جریان په توګه د ټولنې بیلابیلو پاړکیو ته برنامې لري، زمونږ برنامې بیا یواځې د ځوانانو لپاره دي. نجم د اساسنامې او لایحې په اساس یواځې د ځوان نسل تر منځ کار کوي.د اسلام سم پیغام خپرولو او په ټولنه کې هراړخیزې رغونې ته لار خلاصولو په برخه کې مو اهداف نږدې دي.

ځلاند: د نجم پر جوړېدو کلونه تېر شول، خو تاسې فکر نه کوئ چې لا هم ډېر ورو حرکت کوئ؟ معنا دا چې د ټولنې فعالو ځوانانو بيخي کمه توجه مو جلبه کړې او اغېزمن فعاليتونه مو نه تر سترګو کېږي.

نجم د تاسیس په لومړیو پنځو کلونو کې هم د کیفیت له مخې او هم د کمیت له پلوه بې ساري مزل کړی دی. نجم اوس مهال د هیواد په ۳۲ولایتونو کې فعالیت کوي او له ۲۰۰۰ډیر ثبت شوي غړي لري. هر کال د نجم په برنامو کې زرګونه ځوانان برخه اخلي. مونږ په کار کې تدریج ته قایل یو او د عوامي کار تر څنګ د غړو تربیتي وړتیاوې لوړول هم د  کارونو په سر کې راځي. نجم ویاړي چې د تعلیمي نظام په تاریخ کې یې د لومړي ځل لپاره د معارف ستوری ستره سیالي ترسره کړه چې د ۲۶ولایتونو تر ۷۰زره هلکانو او نجونو پکې ګډون وکړ. په پوهنتونونو، ښوونځیو، مدرسو او تعلیمي او تحصیلي ادارو کې منظم فعالیت کوو.

ځلاند:راتلونکي کې څه پلان لرئ؟ څه غواړئ؟

راتلونکي کال کې مو اساسي موخه لا ډیرو تعلیمي او تحصیلي ادارو کې کار کول دي. زمونږ په باور د هیواد د سوکالۍ او پرمختګ راز په تعلیم او تحصیل کې دی. په اوږدمهال کې موخه له اسلام څخه د سمې پوهې په رڼا کې دځوان نسل داسې روزنه او تنظیم دی چې په ټولنه کې مثبت بدلون او په هیواد کې ملي پرمختګ ته لار هواره کړي.