وسله وال طالبان وایي افغان حکومت د بیجینګ غونډه کې خنډونه جوړوي. د وسله والو طالبانو یوه مهم غړي د نامه نه ښودو په شرط بي بي سي پښتو ته ویلي دوی له خپله اړخه د بیجینګ غونډې ته بشپړه تیاري نیولې ده خو افغان حکومت په دې برخه کې خنډونه جوړوي.
دده په خبره ټاکل شوې وه چې د بیجینګ غونډه یو بین الافغاني ډيالوګ وي خو افغان حکومت هڅه کوي چې د طالبانو او حکومت د مخامخ خبرو رنګ ورکړي.
دده په وینا ددې غونډې د ګډونوالو خبرې به یوازې نظرونه وي او پرېکړه به نه پکې کېږي خو حکومت د پرېکړې تمه لري.
دغه طالب چارواکي دا هم ویلي چې د افغان حکومت په لېست کې د حکومت لوړپوړي چارواکي ځای پر ځای شوي په داسې حال کې چې په دې کې باید د ټول افغانستان استازي شامل وي.
خو د سولې په چارو کې د دولت وزارت بیا وايي دوی له خپله اړخه تیاری نیولی دی او د چین او طالبانو د تیاري په تمه دي.
له دې وړاندې هم په ځلونو واره حکومت پټ خپل استازي داسې غونډو ته لیږلي خو چې طالبان پرې پوه شوي له مجلسونو یې منع کړي.
