د اتریش حکومت تر یوه حقوقي دعوې وروسته پریکړه کړې چې د براوناو په ښار کې د آدولف هټلر د زیږیدو ځای او کور د پولیسو په یوه مرکز بدل کړي. د دې پریکړې هدف د دې مخه نيول دي چې دا کور د نازيانو د يادون پر ځای بدل شي.
د دې کور د شکل او بڼې د بدلولو له پاره د نومبر په میاشت کې د اورپا په کچه د معمارۍ یوه سیالي په لاره اچول شوې ده. ټاکل شوې ده چې د ۲۰۲۰م کال په لومړۍ نیمایي کې د کارپوهانو یو پلاوی د تر ټولو ښې وړاندیز شوې طرحې په باره کې تصميم ونیسي.
که څه هم آدولف هټلر(۱۸۸۹-۱۹۴۵ م کال) چې وروسته پر یوه دیکتاتور بدل شو یوازې د خپل ژوند لومړنۍ څو میاشتې په دې کور کې تیرې کړي وې، خو دې ځای له ټولې نړۍ څخه نازیان ځانته را جلب کړي دي.
دې کور تر ضبطیدو وروسته، د ۲۰۱۷ م کال په لومړیو کې د اتريش جمهوریت پورې تعلق پيدا کړ. دا کور د اتریش حکومت او د کور مالک ترمنځ تر یوې اوږدمهالې حقوقي دعوې وروسته حکومت ته وسپارل شو. مخکې تر دې دا کور تر نږدې یوې پيړۍ پورې د ګرلنده پومبر، له کورنۍ سره وه او دوی یي مالکان وو.
سږ کال دغه حقوقي دعوی وروسته له هغې پای ته ورسیده چې د اتریش سترې محکمې پریکړه وکړه چې د پومر کورنۍ ته دې ۸۲۱ زره یورو جبران خساره ورکړل شي.
