طالبانو تیره شپه د کندوز ولایت د امام صاحب په ولسوالۍ کې د ملي اردو په یو مرکز برید وکړ چې وروسته نښته پیل شوه. پدې نښته کې ۱۳ تنه افغان سرتیري مړه او ۵ تنه نور ټپیان شويدي.
د سیمې نه د ترلاسه شوو معلوماتو له مخې طالبانو تیره شپه په ناوخته ساعتونو کې د امام صاحب ولسوالۍ د ارباب خیلو په سیمه کې د افغان ځواکونو په مرکز برید وکړ.
د بله پلوه د افغانستان د دفاع وزارت بیا په کندوز کې د افغان سرتیرو د وژلو خبر ردوي او وايي چې افغان سرتیرو ته ځاني زیان ندی اوښتی.
طالبانو د برید مسئولیت په غاړه اخیستی دی.
طالبانو د ټولنیزې مډیا له لارې په کړو څرګندونو کې ویلي دي چې تیره شپه يي د کندوز د امام صاحب په ولسوالۍ کې پر افغان ځواکونو د برید سره ګن شمیر سرتیرو ته مرګ ژوبله اړولې ده .
