د لوګر په ازره کې «پاکستانۍ چورلکه» لوېدلې
د لوګر ولایتي چارواکو رسنېو ته ویلي چې پر لوېدلې چورلکه د پاکستان بیرغ او ځینې نورې نښانې لیدل کېږي، تر اوسه څرګنده نه ده چې پاکستاني چورلکه افغانستان ته د څه لپاره راغلې.
دغه چورلکه داسې مهال د افغانستان په خاوره کې لوېږي، چې د کابل او اسلام اباد اړیکې د ملي يووالي حکومت له تاسیس راهیسې تر بل هر وخت خرابې دي.
د لوګر ولایت ویاند سلیم صالح رسنیو ته وویل: «تر اوسه څرګنده نه ده چې چورلکه د تخنیکې عوارضو له وجې غورځېدلي او که د وسله والو له خوا غورځول شوې.»
خو بل لور ته د پېښې عینې شاهدان وایې چې چورلکه د طالب وسله والو له لورې غورځول شوې ده.
صالح زیاته کړه چې پلټنې روانې دي چې چورلکه څنګه غورځېدلي او پاکستاني چورلکه د څه موخې لپاره افغانستان ته راغلې.
په چورلکه کې ۶ تنه سپاره ول چې د وسله والو په لاس کې دي.
تر دې دمه پاکستاني رسنېو او حکومتي چارواکو د پېښې په اړه څه نه دې ویلي.
