د بغلان اوسېدونکي وايي، امنيتي ځواکونه عام وگړي د طالبانو په نامه ځوروي او په زوره يې د سيمې پرېښودو ته اړ باسي. ولايت مقام ته راغلي د بغلان اوسېدونکو څرگنده کړه، چې د تصفيوي عملياتو له پای ته رسېدو وروسته امنيتي ځواکونو ځينو سيمو کې شپني عمليات ترسره کړي، چې يوازې ولسي وگړو ته يې مرگ ژوبله اړولې ده.
د بغلان د ډنډغوري او ډنډشهاب الدين سيمو په تېره جگړه کې امنيتي ځواکونو له اوو سوو ډېرو ولسي وگړو ته مرگ ژوبله اړولې وه، چې له امله يې د سيمې مشران او سپينږيري کابل ته په شکايت راغلي وو. ياده جگړه کې د ملي اردو د عسکرو د درنو وسلو په ډزو او بمباريو کې لږ تر لږه زر ولسي کورونه وران شوي وو.
خو دې سيمو کې د امنيتي ځواکونو له عملياتو وروسته طالبان بېرته راوگرځېدل او سيمې يې تر خپلې ولکې لاندې راوستې. وروستۍ دوه اوونۍ بغلان کې يو وار بيا د امنيتي ځواکونو او طالبانو تر منځ نښتو زور اخيستي. همدا اوس هم له سلو ډېر امنيتي کسان يوه پوځې اډه کې د طالبانو تر کلابندۍ لاندې دي او وايي، چې د کلابندۍ کړۍ ورو ورو پرې ورتنگېږي.
خو د ډنډغوري د اقصا سيمې اوسېدونکي وايي، امنيتي ځواکونو تېره شپه دلته عمليات وکړل او د طالبانو پر ځای يې لسگونو ښځو او ماشومانو ته مرگ ژوبله واړوله. خلکو د امنيتي ځواکونو دا کار لاسي وباله او زياته يې کړه، چې سيمه کې پښتانه د خپلو ځايونو پرېښودو ته اړ ويستل کېږي.
د بغلان والي وايي، د يادې پېښې په اړه يې يو ځانگړی کميسيون ټاکلی، څو پېښه وڅېړي او پايلې يې دوی سره شريکې کړي.
