تېره شپه د ننګرهار د بهسودو ولسوالۍ په مرزا کلا کې د يوې کورنۍ اته غړي په مرموزه توګه وژل شوي دي.
پېښه د يوسف په نامه د پکتيا د يوه اوسېدونکي په کور کې رامنځته شوې ده، نوموړی له تېرو څو کلونو راهيسې دلته مېشت و.
د ننګرهار د والي وياند عطاء الله خوږياڼي د پېښې پخلی کړی او زياته کړې يې ده، چې تېره شپه درې تنه مېلمانه د يوسف کور ته ورغلي وو، له ډوډۍ خوړلو وروسته کله چې ټول ويده شوي، مېلمنو د کور اته تنه وژلي دي. د هغه په وينا وژل شوي کسان پنځه تنکي کوچنيان، يوسف، د هغه مېرمن او د هغه مور دي.
وژونکو له پېښې وروسته دروازه له بهره قلف کړې ده او پر خپله مخه تللي.
ځايي پوليس وايي، د پېښې د عاملينو په اړه يې تر اوسه څه معلومات په لاس کې نه شته، خو په اړه يې پلټنې روانې دي.
