بهرنيو چارو او ملي امنيت کې د پاکستان د لومړي وزير سلاکار سرتاج عزيز څرگنده کړې ده، چې افغانستان سره سوله د پاکستان بهرنی سياست دی او پاکستان د سولې د هغو خبرو اترو ملاتړ کوي، چې مشري يې افغانان وکړي.
ښاغلي عزيز پرون اسلام اباد کې د افغانستان سفارت کې د خبرو پر مهال وويل، چې د پاکستان امنيت د افغانستان امنيت پورې تړلی دی او ترورېزم د دواړو هېوادونو گډه ستونزه ده.
پاکستاني رسنيو د سرتاج عزيز له خولې ليکلي دي، چې پاکستان افغانستان کې د تلپاتې سولې غوښتونکی دی او افغانستان سره ښې اړيکې لرل د پاکستان د بهرني سياست برخه ده.
هغه زياته کړې ده: «زموږ په فکر د پاکستان او افغانستان تر منځ نږدې همکاري د سيمې د ترهگرۍ د له منځه وړو لپاره اړينه ده». سرتاج عزيز دا څرگندونې په داسې حال کې کوي، چې د طالبانو او افغان حکومت تر منځ د سولې د خبرو د ناکامېدو له امله د دواړو هېوادونو اړيکې خرابې شوې او افغانستان په ټينگه وويل، چې تر څو پاکستان په عمل کې رښتينولي نه وي ښودلې، په خبرو به يې باور ونه شي.
