د بغلان د ولايتي شورا يو شمېر غړو ويلي دي، چې حکومت او د امنيتي ادارو چارواکي د بغلان د خراب امنيتي وضعيت په اړه ولس ته رښتيا نه وايي. بغلان د افغانستان له هغو ولايتونو دی، چې د مرکز په شمول يې گڼې ولسوالۍ د طالبانو تر سختو بريدونو لاندې دي او ځينو سيمو کې وسله وال په بشپړ ډول واکمن دي.
د بغلان د ولايتي شورا يوه غړي رسنيو ته وويل، چې دلته امنيتي وضعيت او د حکومت بې غورۍ خلک خورا اندېښمن کړي دي. هغه زياته کړه: «حکومت سرتېرو ته يوازې ټوپک او رېنجر ورکوي او نور هيڅ امکانات ورته نه برابروي».
ښاغلی بارکزی څرگندوي، چې دهنه غوري ولسوالۍ عملا له طالبانو سره ده او د مرکزي بغلان، بورکې، تالاو برفک او نهرين ولسواليو سربېره گڼې نورې سيمې د سقوط په حال کې دي. وسله والو طالبانو تېره ورځ د مرکزي بغلان زوړ ښار سيمه هم نيولې ده.
خو د ملي دفاع وزارت مرستيال وياند وايي، چې حکومت د بغلان حالات څاري او هڅه کوي، چې ژر تر ژره دې ولايت کې وسله وال طالبان وځپي.
