پاکستان له دې وړانډې درې ځل افغان کډوالو ته پاکستان کې د استوگنې اضافي وخت ورکړی او دا يې څلورم ځل دی، چې افغانانو ته د نور وخت ورکولو پرېکړه کوي.
د پاکستان کورنيو چارو وزير چوهدري نثار علي خان نن د پاکستان مشرانو جرگې «سنا» په خپل کلني راپور د افغان کډوالو په اړه وويل، چې دوی بايد افغان مهاجرينو ته نور وخت هم ورکړي، له دې پرته ورسره بله لاره نه شته او همدا رنگه افغان حکومت هم پر پاکستان ټينگار کوي، چې کډوال په زوره را ونه شړي او د اوسېدو موده يې نوره هم وغځوي.
د پاکستاني چارواکو په وينا د سرشمېرنې له مخې پنځلس لکه راجستر افغانان په پاکستان کې اوسيږي، نږدې دوه ميليونه ناقانونه افغان کډوال هم په پاکستان کې پراته دي او همدا رنگه لکونو افغانانو د پاکستان هويت پاڼې اخيستي او پاکستان کې پرې خپل کاروبار او ژوند کوي.
د چوهدري نثار په وينا کورنيو چارو وزارت، بلوچستان او خيبرپښتونخوا حکومتونه افغانانو ته د نور وخت ورکولو مخالف دي، مگر د سرحدو او مهاجرينو وزارت ټينگار کوي، چې افغانان بايد په زوره ونه شړل شي او نور قانوني وخت ورکړل شي.
