د هلمند والي او د ولايتي شورا غړو دې ولايت کې د زرگونو خيالي سرتېرو له شتونه پرده پورته کړې ده. والي حيات الله حيات ويلي، چې د خيالي ځواکونو د شتون له امله ورځ له بلې امنيتي ستونزې ډېرېږي. نوموړي د ملي اردو او پوليسو ليکو کې د خيالي سرتېرو شتون د هلمند د نا امنۍ اصلي ستونزه وبلله.
د هلمند چارواکي په داسې حال کې د خيالي ځواکونو د شتون خبره کوي، چې تېره اوونۍ هلته سختې نښتې وشوې او د طالبانو بریدونو کې له سلو ډېرو امنيتي ځواکونو ته مرگ ژوبله واوښته.
والي حيات الله حيات وايي: «د هلمند د ملي اردو تشکيل اتلس زره دی، چې دا مهال يې څلوېښت سلنه شتون نه لري». نوموړي د پوليسو په ليکو کې هم د ورته ستونزو د شتون خبر ورکړی او گواښ يې کړی، چې عاملين به يې د قانون منگولو ته وسپاري.
د هلمند د ولايتي شورا مرستيال عبد المجيد اخندزاده هم د دې پخلی کړی. هغه وايي، د پوځي تشکيلاتو شمېر دوه دېرش زره تنه دی، خو اوسمهال يوازې له دولس زرو تر پنځلس زرو سرتېري حاضر دي.
همدا راز د ولايتي شورا رييس عبد الکريم اتل وايي: «تېرو درې مياشتو کې د هلمند امنيتي ځواکونو نهه ميليونه مرمۍ دښمن پسې شړلې دي. امنيتي ځواکونه د مياشتې دېرش لکه لېټره تېل مصرفوي».
ښاغلي اتل د شتو سرتېرو شمېر اتلس زره ياد کړی او په وينا يې د څوارلس زرو خيالي سرتېرو معاشونه لوړپوړي امنيتي چارواکي خپلو جېبونو ته غورځوي.
خو د هلمند امنيتي چارواکي بيا د دغو خبرو په اړه وايي، چې ځينې خلاگانې شتون لري، چې دوی يې د له منځه وړلو هڅې کوي.
د يادونې ده، چې د هلمند د مرکز لښکرگاه د ځينو سيمو په گډون پنځه ولسوالۍ د طالبانو په ولکه کې دي او لا هم دې ولايت کې توندې نښتې روانې دي. دولت بيا بيا هڅه وکړه، د نظامي عملیاتو په ترسره کولو او چارواکو په بدلولو هلته طالبان وځپي، خو لا نه دی توانېدلی.
