د هلمند په نادعلي ولسوالۍ کې وسله والو طالبانو تېره شپه پر يوه پوسته بريد کړی دی. د نادعلي امنيه قوماندان سمونمل عمر جان حقمل رسنيو ته ويلي، چې وسله والو د دې ولسوالۍ د ناقل اباد سيمې پر يوه پوسته بريد کړی دی. نوموړي ويلي، بريد کې دواړو لوريو ته مرگ ژوبله اوښتې ده خو کره شمېره يې نه ده معلومه.
خو د هلمند يوې بلې امنيتي سرچينې پژواک سره خبرو کې ويلي، چې د يادې سيمې پر پوستې د طالبانو بريد کې د پوستې قوماندان ظاهر خان او درې نور پوليس وژل شوي دي. سرچينې زياته کړې ده، چې جگړې تر سهاره دوام درلود.
د سيمې خلک وايي، د طالبانو برید کې د پوستې دوه رېنجر موټر هم سوځېدلي دي.
طالب وياند قاري يوسف احمدي د نادعلي، لښکرگاه او کوفکې سيمو کې د نښتو خبر ورکړی او زياته کړې يې ده، چې گڼ شمېر امنيتي سرتېرو ته يې مرگ ژوبله اړولې ده.
