د طالبانو او پاکستان خبرې؛ طالبان لا هم د ملا برادر پر خلاصون نه دي توانېدلي

له تېرې یوې اوونۍ راهیسې د طالبانو د سیاسي استازو یو پلاوی پاکستان ته پر سفر تللی. د سفر موخه یې د افغان کډوالو، د پولې اړوند مسایلو او د طالب مشر، ملا برادر د خلاصون په باب له پاکستاني چارواکو سره خبرې ښودل شوي. د راپورونو له مخې پلاوي د اپرېل پر دېرشمه له پاکستاني چارواکو سره خبرې اترې درلودې؛ خو طالبان لا هم نه دي توانېدلي چې د ملا برادر خلاصون یقیني کړي.

یوه طالب چارواکي چې په دې مذاکراتو کې يې ګډون لاره، ځینو سرچینو ته د نوم نه ښودلو په شرط وویل، چې د اسلام اباد ناسته کې یې په ځينو موضوعاتو کې پرمختګ کړی، خو يوه مهمه موضوع لا هم نه ده حل شوې، چې هغه د ملا عبدالغني برادر خوشي کېدل دي.

دغه طالب چارواکی وايي، د پاکستان له سیاسي او پوځي چارواکو سره يې د کډوالو او پولې پر سر هم بریالي مذاکرات کړي. دغه طالب مرکچي ادعا کوي چې پاکستاني چارواکو منلې، چې «له دې وروسته به پاکستاني سرحدي ځواکونه د افغانستان خاورې ته نه داخلېږي او هغه پوستې به بېرته شا ته کوي، چې په تېرو څو کلونو کې يې د افغانستان په خاوره کې دننه جوړې کړې دي».
تېرو څو کلونو کې د پاکستان سرحدي پوستې په ډېرو برخو کې د افغانستان خاورې ته په غیر قانوني ډول رامخکې شوي دي او د افغانستان ځینې سرحدې برخې يې لاندې کړې دي، چې له امله يې عام افغانان په غوسه دي.

د طالب پلاوي او پاکستاني چارواکو ترمنځ د خبرو اترو راپور داسې مهال خپرېږي، چې افغان حکومت تېره اوونۍ پاکستان ته د طالبانو د سیاسي استازو پر سفر نیوکه وکړه.

طالب چارواکي وايي، د پاکستان له لوري د افغان کډوالو د بې ځايه ځورونې د ختمېدو ژمنه هم ورسره شوې، خو د ملابرادر په خلاصون بیا هم نه دي بريالي شوي. د سرچینو له خولې پاکستاني چارواکي وايي، ملابرادر له دوی سره د «امريکايي چارواکو يو امانت بندي دی» او د هغوی له خوښې پرته يې نه شي خوشې کولی.

ویل کېږي چې طالبان غواړي چې ملابرادر د پاکستان له بنده ازاد کړي او قطر کې يې د خپل سیاسي دفتر مشر غوره کړي، خو پاکستان وېره لري چې که ملابرادر قطر کې د طالبانو د دفتر مشر شي، شونې ده، د پاکستان پر ضد فعالیت وکړي.
ملا عبدالغني برادر د طالبانو د پخواني مشر، ملا محمد عمر مرستیال و چې په ۲۰۰۹م کال کې د پاکستاني او امریکايي ځواکونو په ګډو عملیاتو کې د پاکستان په کراچۍ ښار کې ونیول شو.