د افغانستان د بهرنيو چارو وزير صلاح الدين رباني نن يکشنبه مشرانو جرگې ته په خپله وينا کې وويل، چې له تېرو څو کالو راهيسې د پرله پسې هڅو سربېره طالبانو سره د سولې په اړه پرمختگ او هيله نه ده ترلاسه شوې.
د بهرنيو چارو وزير د مشرانو جرگې غړو ته وويل، که د سولې په اړه هر پرمختگ ترسترگو شو، د ملي شورا له غړو او ولس سره به يې شريک کړي.
د بهرنيو چارو وزير زياته کړه، چې سوله ملي اجماع ته اړتيا لري او تر اوسه افغان حکومت په دې نه دی توانېدلی، چې په دې اړه ملي اجماع ته ورسيږي.
د افغانستان سولې او امنيت په اړه يې مشرانو جرگې ته وويل، چې راتلونکو مياشتو کې به پلازمېنه کابل کې د اسلامي کنفرانس د غړو علماوو يو کنفرانس ترسره شي، چې افغانستان کې د سولې او ثبات په اړه له شرعي پلوه بحث وکړي.
نوموړي په دې اړه نور معلومات ورنه کړل، خو ډاډ يې څرگند کړ، چې دغه کنفرانس به د افغان سولې په گټور ثابت شي.
«د اسلامي هېوادونو علما به د افغانستان په اړه خپله پرېکړه اعلان کړي، افغان ولس او نړيوالو ته يو ډول ډاډ ور وبښي.»
د بهرنيو چارو وزير د ياد کنفرانس نيټه څرگنده نه کړه.
د يادونې وړ ده، چې افغان ولسمشر واک ته له رسېدو سره سم هېواد کې د سولې لپاره خپله کړنلاره اعلان کړه او زياته يې کړه، چې دی د پاکستان له لارې افغانستان کې روانې جگړې ته د پای ټکی کيږدي.
د همدې موخې لپاره د امريکا، چين، افغانستان او پاکستان څلور اړخيزې ناستې وشوې او حکومت تر ډېره هيله من و، چې پاکستان به طالبان د سولې خبرو ته تيار کړي، مگر له څو پرله پسې غونډو وروسته ولسمشر غني نهيلی شو، چې پاکستان دې طالبان د سولې خبرو کې د گډون لپاره تيار کړي.
له تېرې يوې مياشتې زياته موده وشوه، چې د افغانستان او پاکستان اړيکې يو ځل بيا ترينگلې شوي او د سولې خبرې هم په ټپه ولاړې دي.
ولسمشر تېره اوونۍ د ملي شورا شريکې ناستې ته په خپله فوق العاده وينا کې وويل، چې نور له پاکستان څخه د سولې تمه نه کوي او پر پاکستان يې غږ وکړ، چې طالبان دې له خپلې خاورې وباسي.
ولسمشر گواښ وکړ، که پاکستان له ژمنې سره سم د طالبانو پر ضد گام پورته نه کړي، نو افغان حکومت به ملگرو ملتونو او امنيت شورا کې د پاکستان پر ضد شکايت وکړي او پاکستان به په نړيواله کچه له انزوا سره مخ کړي.
