د لوگر په محمد اغې ولسوالۍ کې د عملیاتو پر مهال د ملي اردو يو لوړپوړی چارواکی وژل شوی دی.
د لوگر د والي وياند سليم صالح رسنيو سره خبرو کې وويل، د ۲۰۳ تندر قول اردو د څلورمې لوا قوماندانۍ د گارنيزيون قوماندان ډگروال محمداجان د دې عملیاتو مشري پر غاړه لرله، چې نن د يوې چاودنې په ترڅ کې ووژل شو.
امنيتي ځواکونو دغه عمليات د محمد اغې ولسوالۍ زرغون ښار سيمه کې نن سهار پيل کړي دي او لا هم دوام لري.
د والي ویاند وايي، ډگروال محمداجان نن ماښام هغه مهال د ماین ښکار شو، کله چې خپل کور ته ننوت. د هغه په وينا بم په ډېر مهارت د نوموړي د کور دروازه کې له مخکې ځای پر ځای شوی و، چې يوازې دی په کې وژل شوی دی.
خو د سيمې اوسېدونکي وايي، وژل شوي چارواکي سره د هغه دوه تنه ساتونکي هم ټپيان شوي دي.
طالبانو لا تر اوسه د پېښې په اړه رسنيو ته څه نه دي ويلي.
د محمد اغې زرغون ښار سيمه کې وسله وال طالبان پراخ فعاليت کوي، دغه سیمه له پلازمېنې کابله يوازې پينځه دېرش کيلو متره لرې پرته ده.
