فتحو خراب کړي یو او ماتو خراب کړي یو
موږ یاره دا خپلو خواهشاتو خراب کړي یو
چاته به په جنګ کې زموږ د ماتې کیسه نه وي یاد
هر ځلې دښمن په دې مادیاتو خراب کړي یو
بس چې د تقدیر د بدلیدو تکل مو کړی دی
خپلو اورنیو احساساتو خراب کړي یو
موږ چې کله هم چاته د کور لارې پرانیستې دي
ځینو تباه کړي یو او زیاتو خراب کړي یو
نورو ته دښمن په نیرنګونو بلا جوړه کړي
موږ خو د دې خپل کاله حالاتو خراب کړي یو
اوس به مو وختي د تمدن برجونه جوړ وو خو
هر ځل یو څو خامو بې احتیاطو خراب کړي یو
څنګه مو هادي په تشو لاسو، سوبه وکړله؟
څنګه اوس د نورو امکاناتو خراب کړي یو؟
