نيشنل انټرسټ امريکايي مجلې ليکلي، چې ناټو وېره لري، که ناټو ځواکونه نور مجهز نه شي او پر همدې رواجي وسلو سمبال وي، نو اروپايي هېوادونه به د روسيې لپاره د خپلو هېوادونو ډېره ځمکه له لاسه ورکړي.
نېشنل انټرسټ د رانډ امريکايي څېړنيز مرکز د څېړنو له مخې ليکلي، چې کېدای شي روسيه په راتلونکي وخت کې د راوپا پر بالتيک هېوادونو بريد وکړي او دې سره به دغه سيمه کې نوې سړه جګړه پيل شي.
نېشنل انټرسټ د رانډ څېړنيز مرکز د پوهانو له قوله ليکلي، چې دوی پر بالتيک هېوادونو د روسيې بريدوګونو د ګواښ په اړه څېرنه کې دې نتيجې ته رسېدلي، چې ناټو د اوسني نظامي قوت په لرولرو د دغو هېوادونو دفاع نه شي کولای او روسيه به کېدای شي د خپل بريد موخه استونيا، لاتفيا او ليتوانيا وګرځوي.
نېشنل انټرسټ زياتوي، چې د روسيې او اروپا اختلافات اوج ته رسېدلي او له همدې امله د روسيې له لوري پر اروپايي هېوادونو د بريد چانس هم ډېر زيات دی.
د زړو وعدو تکرار
امريکايي مجلې ليکلي، چې د شمالي اټلانټيک نظامي ايتلاف «ناټو» نه يوازې په اروپايي هېوادونو کې د شوروي پوځيانو د ماتو هوډ درلود، بلکې ناټو وايي، چې اروپايي هېوادونو ته هر ډول ګواښ بايد مخکې له مخکې له منځه ولاړ شي او د دې لپاره بايد له جګړې وړاندې له قوي ډيپلوماسۍ کار واخيستل شي او اوس هم ناټو هماغه د ۱۹۴۹م په څېر هغه پخوانۍ وعدې تکراروي او هڅه کوي، چې د نړۍ په هر ګوټ کې روسيې سره د شخړو د مخنيوي لپاره هلې ځلې وکړي.
نېنشل انټرسټ په خپله تبصره کې ليکلي، چې رانډ امريکايي څېړنيز مرکز، چې پر بالتيک هېوادونو د روسيې بريدونو په اړه کومې فرضي لوبې کړي، دې پايلې ته رسېدلي، چې کېدای شي روسيا دغه هېوادونه لاندې کړي، مګر مسکو به دې ته تيار وي، چې د دغو هېوادونو د نيولو لپاره هر ډول تاوان ومني؛ ځکه چې دغه وخت کې به ناټو ځواکونه د روسيې ځينو برخو ته ننوځي او دغه جګړه به نوره هم پراخه شي.
د تبصرې په پای کې راغلي، چې د روسيې سمندري ځواکونه به د ناټو پوځيانو د بريدونو قوي ځواب وايي او ناټو به دغه وخت کې لرې هدف ويشتونکي توغنديو څخه کار اخلي او دغه جګړه به د اوږدې مودې لپاره وغځيږي.
«روسيه به د بالتيک هېوادونه لاندې کړي، مګر دروند زيان به هم ورسره وګالي؛ ځکه چې دغه هېوادونه لاندې کول دومره اسانه هم نه دي.»
