د بغلان ډنډ شهاب الدين سيمه کې د امنيتي ځواکونو او وسله والو طالبانو تر منځ بېگا راهيسې جگړې زور اخيستی دی. چارواکي وايي، د دې سيمې پاکولو سره به د کابل برېښنا په بشپړ ډول سمه شي.
دا په داسې حال کې ده، چې چارواکو درې ورځې وړاندې په څو ساعتونو کې د برېښنا راتېرولو ژمنه کړې وه، خو د خلکو په وينا دغه څو ساعتونه په ورځو بدل شول.
د بغلان د امنيه قوماندانۍ امنيتي امر سمونوال عبد الرشيد بشير رسنيو ته ويلي، امنیتي ځواکونو له درې لوريو پر وسله والو مخالفينو تعرض کړی، څو ژر تر ژره سيمه ونيسي او د برېښنا شرکت کارکوونکي هلته په رسېدو د برېښنا جوړولو پاتې ستونزې هوارې کړي.
خو بل لور ته د سيمې خلک وايي، طالبانو بېگا د جگړې په ترڅ کې امنيتي ځواکونه پر شا تمبولي او مرگ ژوبله يې ور اړولې ده او لا هم جګړه په زور کې روانه ده.
بغلان کې د امنيتي ځواکونو او طالبانو تر منځ روانو جگړو کې نږدې دېرش زره کورنۍ اغېزمنې شوې، چې گڼو يې خپلې سيمې پرېښودې. د ډنډ غوري او ډنډ شهاب الدين بې ځايه شويو اوسېدونکو رسنيو ته وويل، د ملي اردو بمباريو او د توپونو او هاوانونو ډزو يې کورونه ونړول او له اووه سوو ډېرو ملکيانو ته يې مرگ ژوبله واړوله. خو چارواکو د خلکو دغه خبرې رد کړې او زياته يې کړه، چې امنيتي ځواکونو په ډېر پام جگړه پر مخ بېولې ده.
