د يمن کشالې په اړه له تېرې سه شنبې په سويزرلينډ کې روان مذاکرات بې پايلې پای ته ورسېدل.
يمن لپاره د ملگرو ملتونو ځانگړي استازي اسماعيل اولد شيخ احمد وويل، چې په مذاکراتو کې یو څه پرمختگ وشو، خو له اوربنده د سرغړونې له امله زيانمن شول.
اولد شيخ وايي، چې دا مذاکرات به د راتلونکي نوي کال د جنوري په ۱۴مه پيليږي، مگر د مذاکراتو ځای يې ونه ښود.
دا مذاکرات په داسې وخت کې بې پايلې شول، چې د يمن شمال کې د حکومتي ځواکونو او حوثي ملېشو تر منځ خونړۍ نښتې روانې دي.
تېره ورځ عربي رسنيو راپور ورکړی و، چې شمال لويديځ مارب ښار کې د حوثي ملېشو او امنيتي ځواکونو تر منځ نښته کې څلوېښت حوثيان او ۲۸ سرتيري وژل شوي وه.
د ملگرو ملتونو ځانگړی استازی وايي، چې راتلونکو اوونيو کې به يو ځل د يمن په اړه مذاکرات پيل شي او دا ځل به ټوله هڅه دا وي، چې اوربند تلپاتې شي.
سويزرلينډ کې د رسنيو استازي د غونډې د گډونوالو له قوله وايي، چې د دوی ټوله د اوربند عملي کول دي، چې دواړه لوري يې ومني او له اوږد مهالی اوربند وروسته بيا کېدای شي د خبرو له لارې د يمن ستونزه د حل پر لور ولاړه شي.
د سعودي په مشرۍ ايتلاف وايي، چې حوثيانو ۱۵۰ ځل له اوربنده سرغړونه کړې او له ملگرو ملتونو يې په دې اړه د جدي گام اخيستو غوښتنه کړې ده.
د روان کال مارچ راهيسې په دغو جگړو ۵۷۰۰ کسان وژل شوي دي.
د بشري حقونو نړيواله ټولنه وايي، چې د يمن شل مېليونه نفوس څخه يې اتيا سلنه خلک، له خوړو، اوبو او روغتيايي اسانتياوو بې برخې دي.
