کابل کې د متحده عربي اماراتو سفارت ژمنه کړې چې په خوست کې د شیخ زاید په پوهنتون کې یو لوی کدري روغتون جوړوي چې د خوست ولایت او شاوخوا نورو ولایتونو د ناروغانو له پاره د درملنې نږدې مرکز وي. دغه روغتون به په نوو ټکنالوژیو او نورو اړینو وسایلو سمبال وي.
دغه څرگندونې د متحده عربي اماراتو سفیر د یکشنبې په ورځ د خوست له والي حکم خان حبیبي سره په کتنه کې کړي دي. سفیر دغه راز ژمنه وکړه چې د شیخ زاید پوهنتون په پراختیايي چارو باندې به تر ۳۰ ملیونه ډالرو پانگونه وکړي چې په افغانستان کې د پرمختللو پوهنتونونو په کتار کې شامل شي.
سفیر دغه راز زیاته کړه چې له دې پانگونې څخه به ۱۵ ملیونه یوازې د شیخ زاید پوهنتون د طب پوهنځي له پاره د کدري روغتون په جوړولو ولگوي. د اماراتو سفیر ډاډ ورکړ چې له دغه پوهنتون سره به متحده عربي امارات خپلو مرستو ته دوام ورکړي.
شیخ زاید پوهنتون د متحده عربي اماراتو په مالي مرستې جوړ شوی چې گڼ پوهنځي لري او اوسمهال شاوخوا ۶۰۰۰ محصلین لري.
