د افغانستان د کورنيو چارو وزارت خبر ورکړی، چې د امريکا متحده ايالات غواړي، د افغانستان پوليس په ماډرن وسايلو سنبال کړي.
د کورنيو چارو وزارت يوه چارواکي مرتضی رحيمي رسنيو ته ويلي، چې ټاکل شوې ده، چې امريکايان روان کال کې د افغانستان پوليسو سره د څلور سوو او دوه نوي زري گاډو مرسته وکړي.
نوموړي ټينگار کړی چې دې سره به د ملي پوليسو هغه نيمگړتياوې له منځه ولاړې شي، چې د پوځي وسايلو او تجهيزاتو په برخه کې ورسره مخ دي.
د کورنيو چارو وزارت ياد چارواکي څرگنده کړې ده، چې د پوليسو پر ځينو قطعو او زونونو دا مهال د دغو وسايلو وېش پيل شوی او پاتې نورو ټولو باندې به وويشل شي. د وزارت يو بل چارواکی وايي، چې يو شمېر دغه پوځي موټران يې له امريکايي چارواکو څخه ترلاسه کړي دي.
د ښاغلي رحيمي په وينا راتلونکې کې به نږدې سل زره ميله نوې امريکايي وسله هم ملي پوليسو ته ورکړل شي.
