د ترکیې یوې کمپنۍ نن د میزان په لسمه د افغانستان د اوبو او نرژۍ له وزارت سره د کجکي د بند د دویمې د برخې د جوړولو تړون لاسلیک کړ. د اوبو او انرژۍ وزیر علي احمد عثماني نن د تړون د لاسلیکولو په غونډه کې وویل چې د کجکي د دویمې برخې له جوړولو وروسته به دا بند سل میگاواته اضافي برېښنا تولید کړي.
عثماني همدارنگه زیاته کړه چې د دې برخې له جوړولو وروسته به دا بند تر ۲.۳۴ ملیارده متر مکعبه اوبه په خپلې کاسې کې ذخیره کړي. د عثماني په وینا د دې برخې له جوړېدو سره به دا بند وکولای شي چې سل زره هکتاره کرهنیزه ځمکه خړوبه کړي. عثماني دغه راز زیاته کړه چې د کجکي بند جوړېدل د افغانستان د زیربناوو له اساستو څخه شمېرل کېږي.
عثماني وايي چې ټول افغانستان ته د برېښنا رسول له څلورو تر پنځو ملیارده ډالرو پورې پانگې ته اړتیا لري. عثماني له بهرنیو شرکتونو څخه غوښتنه وکړه چې د افغانستان په انرژۍ برخه کې پانگونه وکړي د هغه په وینا دا برخه په راتلونکي کې ډېر عاید لري او دغه کمپنۍ کولای شي چې ترې ډېره گټه تر لاسه کړي.
د کجکي د بند د جوړولو کار په ۱۳۳۲ کال کې پیل شوی وو چې لومړی توربین په ۱۳۵۱ او دویم توربین په ۱۳۵۳ کال کې نصب شول او دریم څو کاله وړاندې امریکایانو د پنځه زره سرتېرو په ځای پر ځای کولو سره نصب کړ چې موده وروسته يې بیا کار پرېښود.
