امریکايي محکمې د روسي پوځ پخوانی افسر په امریکايي او افغان ځواکونو باندې په یوه برید د رول درلودلو په تور په ۳۰ کاله بند محکوم کړی.
۵۵ کلن اریک حمیدالدین د افغانستان په جګړه کې د امریکايي پوځ لومړی دښمن دی چې د دغه هېواد په فدارلي محکمه کې د طالبانو سره د مرستې په تور محاکمه کیږي.
نوموړی د روان کال د اګست په میاشت کې د هغه برید په تور چې د ۲۰۰۹ز کال په نومبر کې طالبانو په سرحدي پولیسو او امریکايي ځواکونو کړی و، محکوم شو. په دغه برید کې نوموړی یواځينی طالب و چې له بریده روغ وتلی و او په دغه پېښه کې امریکايي او افغان ځواکونو ته مرګ ژوبله نه وه اوښتې.
حمیدالله په دې تورن دی چې وسلهوالو ته یې مرستې برابرې کړي او د امریکايي او افغان ځواکونو د وژلو هڅه يې کړې. د هغه مدافع وکیل وايي چې نوموړی به د دغې پریکړې پر ضد استیناف محکمې ته ورشي.
حمیدالله چې په روسي طالب مشهور دی د محاکمې پر مهال وویل چې نوموړی «ترهګر» نه دی او دی د امریکایي اشغالګرو پر وړاندې د ځاني دفاع حق لري.
هغه چې خبرې یې یوه ژباړن ژباړلې وویل: «زه مسلمان یم، زه ستاسو قانون نه منم. زه دا محکمه په رسمیت نه پېژنم».
حمیدالله په افغانستان د امریکا یرغل د فاشیزم او د دوهمې نړیوالې جګړه کې د نازي هټلر سره پرتله کړی دی.
هغه وايي چې امریکا افغانستان اشغال کړی دی او پر وړاندې يې جګړه جرم نه دی.
