د ولسمشرۍ ماڼې امنیت شورا د کابل د پروني برید د معلوماتو له ارزولو وروسته وویل چې برید په پاکستان کې پلان شوی وو او د پېښې په اړه به د نورو معلوماتو د ټولولو هڅې لا هم روانې دي. ولسمشر اشرف غني نن سهار د امنیت شورا د غونډې مشري کوله او د غونډې له مېز څخه یې د پاکستان له لوی درستیز «راحیل شریف» سره ټلیفوني خبرې وکړې او ترې غوښتنه یې وکړه چې د دې ترهگرو په وړاندې دې جدي اقدامات وکړي.
د پاکستان لوی درستیز له ولسمشر سره ژمنه کړې چې د پېښې په اړه به پلټنې وکړي او له افغان لوري سره به معلومات شریک کړي. پر افغان امریکايي پوهنتون د برید له امله د پوهنتون یو استاد، اووه محصلین، د پوهنتون درې امنیتي کارکوونکي او د ملي امنیت درې سرتېري وژل شوي دي.
دوه اوونۍ وړاندې د افغان امریکايي پوهنتون دوه استادان هم د ناڅرگندو وسلهوالو له لوري اختطاف شوي چې تر دې دمه یې په اړه کوم معلومات نه دي ترلاسه شوي.
