د افغانستان دفاع وزارت وايي په ۱۳۹۴ لمريز کال کې يې د وسله والو مخالفينو پر ضد لسگونه زره عمليات کړي.
د دفاع وزارت وياند دولت وزيري د يو کنفرانس په ترڅ کې خبريالانو ته وويل، افغان ځواکونو په تېر لمريز کال کې درې پنځوس زره عمليات کړي، چې د ده په وينا يې په کې زرگونه د دولت مخالفين وژلي او څه باندې لس زره يې نور ټپيان کړي.
نوموړي زياته کړې، د افغانستان دفاع وزارت په تېر کال کې په شپني عملياتو ډېر زور راوستی او ډېر عمليات يې د شپې کړي.
همدا راز د دفاع وزارت د دولت مخالفينو ته گواښ کړی که سولې ته کښېنني پر ضد به يې پراخ عمليات وکړي او له منځه به يې يوسي.
دفاع وزارت د سرتېرو مرگ ژوبلې ته په اشارې ويلي، په دغه درې پنځوس زره عملياتو کې د دوی يوازې دوه زره او اوه سوه سرتېرې وژل شوي. خو نوموړی دا خبرې په داسې حال کې کوي، چې د نړېوالو راپورونو له مخې تېر کال د امنيتي ځواکونو مرگ ژوبله د دې څو چنده ښودل شوې ده.
دفاع وزارت د ملکي مرگ ژوبلې په اړه کومه څرگندونه نه ده کړې، خو نړېوال سازمانونه وايي، تېر کال د ملکي تلفاتو او مرگ ژوبلې لپاره يو خونړی کال و.
سره له دې چې د دې مرگ ژوبلې ډېره پړه د دولت پر وسله والو مخالفينو اچول کېږي، خو د جگړو له سيمي راپورونه وايي، چې امنيتي ځواکونه هم په کې ونډه لري. تېره مياشت هم د بغلان په ډنډغوري سيمه کې د دولت له لورې عمليات ترسره شول، چې د سيمي د اوسيدونکو په وينا امنيتي ځواکونو يې د درنو وسلو په ډزو او بمباريو له زرو ډېر کورونه ونړول او شاوخوا زر تنو ته يې مرگ ژوبله واړوله.
