له څو ورځو پرله پسې جګړو او محاصرې وروسته د هلمند خانشين ولسوالۍ طالبانو ونيوله.
د هلنمد ځايي خبريالان وايي، چې طالبانو له څو ورځو راهيسې د خانشين ولسوالۍ پر مرکز، امنيه قوماندانۍ او اړوندو امنيتي پوستو ډله ييز بريدونه پيل کړي وه او نن مازديګر ناوخته يې د ولسوالۍ مرکز په بشپړه توګه ونيوه.
د هلمند اوسېدونکي وايي، چې امنيتي ځواکونو له څو ورځو پرله پسې مقاومت او محاصرې وروسته خانشين ولسوالۍ طالبانو ته پرېښوده.
د ځايي خبريالانو په وينا امنيتي ځواکونو له مرکزي دولته څو څو ځل د مرستې غوښتنه وکړه، مګر مرکزي حکومت يې مرستې لپاره تازه دمي عسکر راونه لېږل.
د هلمند يو خبريال صديق افغان وايي، چې د ولسوالۍ د سقوط پر مهال ۲۱ پوليس وژل شوي او د ولسوالۍ امنيه قوماندان هم ټپي دی.
د طالبانو وياند قاري محمد يوسف احمدي منلې، چې د دوی جنګياليو له تېرو څو ورځو راهيسې پر ولسوالۍ بريدونه پيل کړي وو، چې نن غرمه دوولس بجې يې د ولسوالۍ دوه امنيتي پوستې ونيولې او له هغې وروسته يې د ولسوالۍ پر مرکز سخته جګړه پيل کړه، چې بالاخره نن مازديګر ناوخته يې د ولسوالۍ مرکز او اړوند پوستې په بشپړه توګه ونيولې.
د طالبانو وياند زياتوي، چې جنګياليو يې په ولسوالۍ کې پرېمانه سپکې او درنې، پوځي وسايط او ګڼ موټر نيولي دي.
د هلمند ولايت وياند عمر ځواک د خبريالانو پوښتنو ته ځواب نه وايي او مرکزي حکومت تر اوسه په دې اړه رسنيو ته څه نه دي ويلي.
