ځينو ان جي او ګانو د امريکا د بهرنيو چارو وزارت څخه مهاجرينو ته د امريکا په مختلفو پوهنتونو کې د وړيا زده کړې اجازه اخيستې، چې په دغو پوهنتونو کې د هارورډ مشهور پوهنتون هم شامل دی.
يادو ان جي او ګانو په سلو پوهنتونو کې مهاجرينو ته د وړيا زده کړو اجازه ترلاسه کړې ده. مګر ويل کېږي چې د دغه زده کړو شکل به آنلاين وي. معنا دا چې محصلين به د انټرنټ له لارې په مختلفو پوهنتونو کې زده کړې کوي.
رويټرز خبري آژانس زياتوي چې دغه قدم د دې له پاره پورته شوی چې مهاجرين د نړۍ په مختلفو برخو کې مختلف مهارتونه زده کړي، چې په راتلونکي کې د دوی د کار تضمين وکړي. آنلاين زده کړې شاوخوا سل ډالره فيس لري، خو سرچينه زياتوي چې له دغې لارې به مهاجرينو ته بالکل وړيا وي.
