د ولسمشر محمد اشرف غني پخوانی حقوقي سلاکار، عبدالعلي محمدي له یوه خصوصي ټلویزیون سره په خبرو کې ویلي چې ولسمشر غني د فساد پر ضد د مبارزې اراده لري؛ خو ولسمشر ناتوانه دی.
محمدي وايي: «ولسمشر غني اراده لري؛ خو جدي ستونزه یې په پرېکړې او اقدام کې ده او د مقابلې توان نه لري».
عبدالعلي محمدي د ولسمشر غني حقوقي سلاکار و چې په یوه قرارداد کې د کابل بانک د مالي دوسيې د یوه تورن د حضور له امله یې دنده وځنډول شوه.
ښاغلی محمدي وايي، فسادکوونکو حکومت رایسار کړی دی. محمدي د ځان په اړه د ولسمشر پرېکړه چې د ده دنده یې وځنډوله «غیرعادلانه» بولي.
د ولسمشر پخوانی سلاکار ولسمشر غني په «توپیریز چلن» هم تورنوي.
ښاغلی عبدالعلي محمدي شاوخوا څلور میاشتې وړاندې د ولسمشر د یوه فرمان له لارې له خپلې دندې لرې کړای شو.
