امريکايي چارواکو خبر ورکړی، چې د سوريې له نورو ښارونو وروسته حلب کې هم اوربند اعلان شوی دی. په عين وخت کې د ملگرو ملتونو مقاماتو د سوريې رژيم پر جنگي جرمونو تورن کړی دی.
د سوريې حلب ښار کې وروستۍ جگړې خورا خونړۍ وې، چې له امله يې سلگونه ولسي وگړي ووژل شول. د حلب اوسېدونکو ښار کې د جمعې جمع له دې امله بنده کړه، چې دولتي او روسي الوتکې پرې بمبارۍ کوي.
د امريکا د بهرنيو چارو وزارت پرون وويل، روسيې سره په دې اړه هوکړې ته رسېدلي، چې اوربند حلب ښار ته هم وغځېږي. چارواکي وايي، د اوربند له اعلان لږ وروسته تاوتريخوالي کې د پام وړ کموالی راغلی. د امريکا د بهرنيو چارو وزير جان کيري د يوې اعلاميې په خپرولو ويلي: «له ښکېلو لوريو يې غوښتي، د اروبند مراعت وکړي». نوموړي زياته کړه: «موږ له ټولو لوريو تمه لرو، چې حلب کې د اوربند په مراعتولو جگړه ودروي. د سوريې رژيم او مخالفان يې بايد دې ته پام وکړي».
خو خپله د اوربند په اړه د هوکړې گډونوال ډاډه نه دي، چې دا اوربند به څومره دوام وکړي. پخوا هم د سوريې ځينو ښارونو کې اوربند اعلان شوی، خو هر ځل ډېر ژر مات شوی او جگړو يو ځل بيا ولسي وگړو ته درانه تلفات اړولي دي.
د سيمې خلک وايي، تېره شپه هم حلب کې نښتې شوې دي او لا هم د سپکو او درنو وسلو ډزې اورېدل کېږي، چې خلک يې له امله وېرې نيولي دي.
