په پاکستان کې مېشتو ثبت شویو افغان مهاجرینو د پاتې کېدو موده دوه کاله نور تمدیدیږي.
ایکسپریس نیوز پاکستانۍ ورځپاڼې د یوې سرچېنې له قوله لیکلي چې د پاکستان حکومت د مهاجرینو په خپله خوښه بېرته ستنیدو کې ناکام شوی او له همدې کبله د مهاجرینو دوه نورو کلونو پاتې کېدو لپاره يې طرحه د وزیرانو شورا ته لېږلې.
په پاکستان کې د مېشتو راجستر افغانانو د پاتې کېدو قانوني نېټه د روان کال د دسمبر ۳۱مه ټاکل شوې وه.
د ۲۰۰۲ کال راهیسې له پاکستان څخه ۳۹ لکه افغانان چې له منځه یې ۶۰ زره افغان مهاجرین سږ کال بېرته هېواد ته ستانه شوي دي.
ایکسپریس نیوز د خپلې سرچېنې له قوله وايي چې په پاکستان کې ۱۵لکه راجستر افغانان اوسیږي او د دوی د وتلو وروستی ضرب الاجل د روان کال دسمبر ۳۱مه ټاکل شوې وه خو په ټاکلې موده مهاجرین بېرته ستانه نشول.
د سرچېنې له قوله افغان حکومت، ملګرو ملتونو او د پاکستان د سرحداتو وزارت درې ګونې کمیسیون په پاکستان کې د مېشتو راجستر افغانانو د بېرته ستنېدو لپاره نوی پلان تیار کړ چې له مخې یې د پاکستان سرحداتو وزارت د څلورو ایالتونو د چارواکو سره له مشورې وروسته د افغان مهاجرینو دوه کاله نور پاتې کېدو حتمي پلان منظوریدلو لپاره د وزیرانو شورا ته دغه طرحه ولېږله.
سرچېنې لیکلي چې د وزیرانو شورا به په اینده ناسته کې دغه پلان منظور کړي او افغان مهاجرینو د پاتې کېدو موده به د دوه کلونو لپاره نوره رسما تمدید شي.
