د کابل ښار د دولسمې امنیتي حوزې اړوند د امنيت ښارگوټي يوه کور کې د اوو تنو مړي موندل شوي دي. په وژل شويو کې دوه مېرمنې، څلور سړي او يو کوچنی شامل دي.
د سيمې خلک وايي، په وژل شويو کې يو تن د دولسمې امنيتي حوزې کارکوونکی او د کابل د ولسي شورا يو غړی هم دي، خلک وايي، دوی لومړی الکولي مشروبات څښلي دي او وروسته شايد د غازو نيولو له امله مړه شوي وي.
کابل کې د ابن سينا روغتون کار کوونکي وايي، څلور ورځې وړاندې له همدې ډلې يوه پنځه ويشت کلنه انجلۍ فاطمه په مرگوني حالت کې وروړل شوې وه. هغوی وايي، فاطمه د کابل د امبولانس کارکوونکو په مرسته د کابل د امنيه قوماندانۍ د جنايي جرمونو د څېړنو کارکوونکو وروړې وه.
د روغتون چارواکي زياتوي: «موږ د فاطمې له مړي انځورونه اخيستي و، خو پوليسو هغه له منځه يووړل او له روغتونه ووتل».
د روغتون رييس عبد الوکيل پرواني د پېښې پخلی کړی او زياته کړې يې ده، چې دغې انجلۍ نن ساه ورکړې ده.
د روغتون نورو چارواکو ويلي، له دې انجلۍ سره يو شمېر نور مړي هم روغتون ته وروړل شوي دي، خو په اړه يې نور جزيات نه دي ورکړي.
د سيمې خلک د دې کسانو مړينه مرموزه بولي او وايي، «نه پوهېږو، دوی د يوې کورنۍ غړي وو، که نه».
د دولسمې امنيتي حوزې کار کوونکي د پېښې په اړه څه نه وايي، خو د کورنيو چارو وزارت وياند صديق صديقي ويلي، مړي يې د څېړنو لپاره عدلي طب ته استولي دي.
