په افغانستان کې د پګواش د ادارې مسؤول خليل الله ساپی وايي چې تر اوسه د طالبانو او د افغان حکومت د چارواکو ترمنځ رسمي خبرې اترې نه دي ترسره شوې.
هغه دغه څرګندونې نن ورځ له طلوع تلويزيون سره په خبرو اترو کې وکړې. ساپی وويل چې د افغانستان د حکومت چارواکو او نورو افغان مشرانو به مختلفو ځايونو کې له طالبانو سره کتلې وي، مګر په رسمي توګه خبرې اترې تر اوسه نه دي پيل شوي.
هغه دغه څرګندونې د هغو ګنګوسو په تړاو وکړې چې ويل کېږي چې د افغانستان د ملي امنيت مشاور، حنيف اتمر او د ملي امنيت رياست مشر، معصوم ستانکزي په قطر کې له طالبانو سره د سولې خبرې اترې پيل کړي دي.
ساپی وايي په قطر کې د طالبانو د دفتر خلاصېدل د طالبانو په وړاندېز شوي، مګر قطر نه شي کولای چې د خبرو اترو له پاره پر طالبانو فشار راولي. هغه وويل چې طبيعي ده چې قطر به دوی وهڅولای شي. هغه دغه راز وويل چې د پاکستان پوځ او استخبارات هم کولای شي طالبان خبرو ته وهڅوي، خو په زور و جبر يې د خبرو اترو مېز ته نه شي راوستلای.
خليل الله ساپی وايي چې تېر کال د سولې څلور اړخيزې خبرې ځکه ناکامې شوې، چې پاکستان ونه شو کولای چې طالبان د خبرو مېز ته راولي. هغه وويل چې پاکستان هم ويلې چې دوی به طالبان خبرو ته وهڅوي، مګر فشار پرې نه شي راوړلای.
