وسله والو طالبانو مرکزي بغلان له خلکو غوښتي، چې خپلې ستونزې دوی ته اواري لپاره وروړي. دوی وايي، د خلکو د ستونزو اوارولو لپاره يې تازه يو کميسيون رامنځته کړی دی.
د بغلان د ولايتي شورا غړي بسم الله عطاش د دې خبر پخلی کړی او سلام وطندار سره يې خبرو کې ويلي، چې د طالبانو تر ولکې لاندې سيمو کې ټول خلک خپلې ستونزې د دولتي ادارو پر ځای هغوی ته وروړي. ښاغلی عطاش زياتوي، چې مرکزي بغلان، ډنډغوري او تاله او برفک کې ټول خلک خپلې ستونزې د طالبانو نوي جوړ شوي کميسيون ته د اواري په موخه ور وړي. د هغه په وينا دولت دغو سيمو کې ولکه نه لري او طالبان چې څه غواړي کوي يې.
د بغلان د پوليسو وياند ذبيح الله شجاع هم دا خبره مني او وايي، چې امنيتي ځواکونه پلان لري، چې دغو سيمو کې پراخ عمليات پيل کړي او دغه ولسوالۍ د طالبانو له شتونه پاکې کړي. امنيتي ځواکونو له دې وړاندې هم يادو ولسواليو کې عمليات کړي، خو لا هم نه دی توانېدلي د طالبانو زور هلته کم کړي.
بل لور ته د بغلان په شمول د گڼو ولايتونو اوسېدونکي وايي، د ستونزو د اواري لپاره د دولتي ادارو په ځای ځکه د طالبانو کميسيونونو ته رجوع کوي، چې ستونزې يې سمې او ژر وراواروي، همدا راز د ستونزو د حل پر مهال له رشوت ورکولو خلاص دی، هغه څه چې دولتي ادارو کې له هغه پرته نږدې هيڅ ستونزه نه اوارېږي.
