د ايران حکومت سعودي تورنوي چې د ايراني حکومت له اپوزيسيون سره مرسته کوي. د ايراني حکومت د ګټو پېژندلو د مجمع مشر محسن رضايي ګواښلی چې که چېرته غوسه شول، د سعودي نظام به د تل له پاره د ځمکې له سره پورته کړي.
آر ټي خبري رسنۍ د ايران پر فارس خبري آژانس راپور ورکوي چې محسن رضايي دغه څرګندونې د انسټګرام په ګډون د خواله رسنيو له لارې کړې دي. هغه ليکلي: «د سعود کورنۍ ته مو پيغام دا دی چې موږ ژر نه غوسه کېږو، خو که غوسه شوو، د ځمکې پر سر به د آل سعود (د سعودي حاکمې کورنۍ) اثر پرېنږدو.»
رضايي دغه څرګندونې د سعودي د استخباراتو پخواني مشر ترکي الفيصل د هغو څرګندونو په ځواب کې کړې، چې په پاريس کې يې د ايران د مجاهدين خلق، چې د حکومت اپوزېسيون دی، په غونډه کې کړې وې. هغه ويلي وو چې د ايران له ملت سره د دوی په انقلاب کې ولاړ دی. رضايي ويلي چې فيصل مجاهدين خلق ته په ايران کې د وژنو امر کړی. هغه زياته کړې چې تېرو څو کلونو کې چې مجاهدين خلق په ايران کې څه سياسي وژنې ترسره کړې دي، سعودي په کې لاس لري.
