که حزب اسلامي «واقعیتونه درک نه کړي» ښايي خبرې له ستونزې سره مخ شي
د سولې عالي شورا مرستیال، عطاالرحمان سلیم کابل ته د ګلبدین حکمتیار د راتلو د ګنګوسو په اړه پر خپل فېسبوک لیکلي چې د ښاغلي حکمتیار راتګ تر اوسه مطرح نه دی. سلیم لیکي: «کابل ته د ګلبدین حکمتیار راتګ ردوم».
دا په داسې حال کې ده چې له څو ورځو راهیسې داسې ګنګوسې خپرېږي چې د افغان حکومت او د حکمتیار د حزب اسلامي ترمنځ د سولې خبرې وروستیو پړاونو ته رسېدلي او ښايي ولسمشر غني او حکمتیار په ارګ کې وروستۍ هوکړه لیک لاسلیک کړي.
د سولې عالي شورا مرستیال وايي: «کابل ته د ښاغلي حکمتیار راتګ تر اوسه مطرح نه دی او د سولې عالي شورا او د حزب اسلامي د پلاوي ترمنځ وروستۍ هوکړه هم تر اوسه نه ده شوې».
عطالرحمان سلیم هیله څرګندوي چې حزب اسلامي د «ټولنې عیني واقعیتونه درک کړي» او د ملي ګټو په پام کې نیولو سره «داسې مسیر خپل کړي چې پایلې يې مثبتې او مفیدې وي».
د سولې عالي شورا مرستیال وېره څرګندوي که د حزب اسلامي پلاوی «واقعیتونه او ملي ګټې» په نظر کې ونه نیسي، ښايي «د خبرو لړۍ به ستونزې سره مخ شي».
