د افغانستان سولې عالي شورا وايي، چې د جگړو له لارې د افغانستان جگړه پای ته نه رسول کيږي او دغه جگړه بايد د خبرو اترو له لارې حل شي.
د سولې عالي شورا د دارالانشا رييس محمد ايوب رفيقي ټينگار کوي، چې د تېرو پنځلسو کالو درنو او خونړيو جگړو، نه يوازې دا چې مخالفين ختم يا کمزوري نه کړل، بلکې نور يې هم قوي کړل او اوس، چې د هېواد امنيتي چارې افغان حکومت ته سپارل شوي، نو حکومت نه شي کولای، چې په يوازې ځان د مخالفينو د بريدونو او جگړو مقابله وکړي.
ښاغلي رفيقي زياته کړه، چې د سولې عالي شورا به له جگړې پرته پر نورو لارو چارو غور وکړي، چې جگړه پای ته ورسيږي او حکوت بايد د دې شورا له لارې د خلکو اعتماد ورخپل کړي او جگړه پای ته ورسوي.
رفيقي تېر کال د طالبانو له لوري د کندوز نيولو ته په اشاره وويل، چې طالبانو په لنډه موده کې د خپلو سلگونو جنگياليو په واسطه کندوز له دولته ونيو او که د امريکايي جنگي الوتکو مرسته نه وای، نو حکومت کې د دې توان نه و، چې کندوز ونيسي.
«موږ په ټينگار سره وايو، چې حکومت بايد د جگړې پر ځای پر خبرو باور ولري، د سولې عالي شورا ته مخه پرانيزي، چې د څلور اړخيزو ناستو د ناکامۍ په صورت کې له نورو لارو چارو کار واخلي او که داسې ونه شي، نو د هېواد اوسنی امنيتي حالت د اندېښنې وړ دی، هلمند او نورو سيمو کې طالبان مخ پروړانډې روان دي او راتلونکو وختونو کې د دې گواښ ډېر دی، چې گڼې ولسوالۍ او مهمې سيمې سقوط وکړي.»
د سولې عالي شورا استازي په داسې وخت کې د جگړې پر ځای پر سوله ييزو لارو چارو ټينگار کړی، چې حکومت گواښ کړی، که هر څوک د سولې پروسې نه يو ځای کيږي، پر ضد به يې پوځي عمليات کيږي او د زور له لارې به يې خبرو ته حاضروي.
د افغانستان حکومت له تېرو څو مياشتو هيله در لوده، چې د امريکا، چين، افغانستان او پاکستان په څلور اړخيزو ناستو کې به طالبان د سولې خبرو ته تيار شي، ولې طالبانو دغو ناستو کې له گډون انکار وکړ او د غه پروسه يې يو ځل بيا له خنډ او ځنډ سره مخ کړه.
د سياسي چارو شناند نظر محمد مطمين وايي، چې پاکستان پر طالبانو دومره اغېز نه لري، چې په خپل فشار او نفوذ يې د سولې خبرو ته کينوي.
د سولې عالي شورا د دارالانشا رييس محمد ايو رفيقي وايي، چې هېواد کې د اداري فساد، د چارواکو او خلکو ترمنځ واټن، پر حکومت د خلکو بې باوري او د سولې په اړه د چارواکو ضد او نقيض نظرونه د وسله والو مخالفينو د جگړې دليل بلل کيږي او حکومت بايد په دغو برخو کې خپلو کړنو ته پاملرنه وکړي.
