جگړه کې د گډون لپاره د امريکا ځانگړي ځواکونه له هلمند وروسته کندز ولايت ته هم تللي دي. د کندز چارواکو تاييد کړې ده، چې د طالبانو پر ضد جگړه کې يې امريکايي پوځيان د مرستې په موخه کندز ته رسېدلي دي.
د هيواد په شمال ختيځ زون کې د پامير ۲۰ فرقې قوماندان جنرال محي الدين غوري رسنيو ته ويلي: «د امريکا ځانگړي ځواکونه د افغان ځواکونو د ملاتړ په موخه کندز ته ننوتي دي». جنرال غوري د امريکايي ځواکونو د دندې او شمېر په اړه څه نه دي ويلي، خو زیاته کړې يې ده، چې ځانگړي امريکايي ځواکونه د شپې له مخې دشت ارچي کې د وسله والو پر ضد په شپنيو عملياتو کې برخه اخلي.
دا په داسې حال کې ده، چې امريکا د ۲۰۱۴ز له پای ته رسېدو سره افغانستان کې خپل جگړه ييز ماموريت پای ته رسېدلی اعلان کړی و او دلته د پاتې کېدو موخه يې د افغان ځواکونو ملاتړ او روزنه ښودلې ده.
بل پلو حکومت څو ورځې وړاندې کندز کې د طالبانو ضد عملياتو د پيلولو خبر ورکړی دی. د کندز نږدې ټولې ولسوالۍ اوسمهال د طالبانو په کنترول کې دي او چارواکي وېره څرگندوي، چې که پر ضد يې عمليات ونه شي، طالبان به يو ځل بيا ښار سقوط کړي.
