د م. م سازمان له لوري خپرې شوې خبرپاڼې خبر ورکړی، چې افغان حکومت يو وار بيا ژمنه کړې، د امنيتي ځواکونو ليکو ته به د کوچنيانو د جذبولو مخنيوی وکړي.
افغانستان لپاره د کوچنيانو چارو کې د ملگرو ملتونو ځانگړې استازې ليلا زيروگي افغانستان ته له يوه پينځه ورځيني سفر وروسته ويلي، کابل ورسره ژمنه کړې، چې راتلونکې کې به له کوچنيانو د سرتېرو په توگه گټه نه پورته کوي.
دا په داسې حال کې ده، چې حکومتي چارواکو تېرو ورځو کې د ملگرو ملتونو هغه دعوه ناسمه بلله، چې د افغانستان د ملي اردو او پوليسو ليکو کې کوچنيان شتون لري او جگړو کې ونډه اخلي.
اغلې زيروگي زياته کړې ده، په دې اړه پرمختگ رامنځته شوی دی او د مخنيوي لپاره يې يوه سياسي اراده شتون لري. «دې لار کې چې کوم پرمختگ وينو، تمه بښونکی دی. د افغانستان حکومت چې کومه ژمنه کړې، د امنيتي ځواکونو ليکو ته د کوچنيانو د جذب په مخنيوي کې شايد يوه نوې پاڼه پرانېزي».
د ملگرو ملتونو استازې پر ټولو ښکېلو خواوو غږ کړی، څو په دې اړه نړيوالو قوانينو ته احترام ولري او په مخنيوي کې يې لازم تدابير ونيسي. د م. م راپور د وسله والو طالبانو په اړه هم ورته څرگندونې کړې وې، خو طالبانو دغه راپور رد کړ.
