د ایران د نفتو وزیر «بېجان زنګینه» رسنیو ته وویل چې موږ تیار یو د سعودي په ګډون له اوپیک هېوادنو سره د تېلو د تولید په اړه خبرې وکړو.
له ایران څخه د اقتصادي بندیزونو له ختمولو وروسته ایران اعلان کړه چې دوی به د ورځې ۵۰۰ زره بېرله تیل تولیدوي. د ایران له دې اعلان سره د تېلو د تولیدوونکو هېوادونو اندېښنې ډېرې شوې، چې گواکې د ایران دغه کار به د تېلو بیې په نړیوال مارکیټ کې نورې ټیټې کړي.
د ۲۰۱۵م له جون راهیسې د تېلو بیې په نړیوال مارکېټ کې راپرېوتې دي. د اقتصادي چارو کاروپوهانو تمه کوله چې له ایران څخه د اقتصادي بندیزونو له لهمنځه وړلو وروسته به په نړیوال مارکېټ کې د تېلو بیې نورې هم پرېوځي.
د روان کال په جنورۍ کې سعودي شیعه مشر نمر النمر له ۴۶ نورو سره یواځای اعدام کړ چې له امله یې د سعودي او ایران تر منځ سیاسي اړیکې پرې شوې او تر دې دمه دواړه لوري یوه بل سره سفارتي اړیکې نه لري.
