طالبانو د یوې خبرپاڼې په خپرولو سره د موبي گروپ (طلوع نیوز، لمر او طلوع ټلویزیونونو او ارمان راډیو) د کارکوونکو د لېږد پر موټر د برید مسوولیت ومانه.
دغه برید چې د چارشنبې په ماښام د دارالامان پر واټ ترسره شو، د موبي گروب اووه تنه کارکوونکي وژل شوي او تر پنځلسو ډېر ټپیان دي. ناتایید شوي راپورونه وايي چې په وژل شوو کې د طلوع نیوز خبریاله، شکیلا ابراهیم خیل هم شامله ده.
طالبانو په خپله خبرپاڼه کې طلوع ټلویزیون «استخباراتي دستگاه» گڼلې او د برید لامل یې «له اسلام سره دښمني، په افغاني فرهنگ ملنډې او د کندز ښاریانو ته سپکاوی » گڼلی.
کله چې وسله والو طالبانو تېر سپټمبر کې د کندوز ښار ونیو، طلوع نیوز په یوه راپور کې تور پورې کړی و چې گواکې طالب جنگیالیو د پوهنتون د ښځینه زده کړیالو پر شپه غالي ننوتي او پر نجونو یې جنسي برید کړی.
طالبانو په خبرپاڼه کې ویلي چې «طلوع ټلویزون باید له افغانانو، د اسلامي امارت له مجاهدینو او د کندوز له ښاریانو بښنه وغواړي». طالبانو گواښ کړی، که طلوع نیوز خپلو ورته کړنو ته دوام ورکړي «دا به وروستی برید نه وي».
