د ننگرهار اچین کې د ناټو د بېپیلوټه الوتکو په برید کې د داعش قومندان له درې تنو سره یوځای وژل شوی. الوتکو د ماسپښین په دوو بجو د داعش دغه ډلگۍ په نښه کړې وه.
د ننگرهار ولایت ویاند عطالله خوگیاڼي رسنیو ته وویل: «بېپيلوټه الوتکې د داعش ډلې یو موټر په اچین ولسوالۍ کې په نښه کړ چې د داعش قومندان قاري سجاد له نورو درې تنو سره یوځای په کې لهمنځه ولاړه».
ویاند همداراز زیاته کړه چې د ناټو په نورو هوايي بریدونو کې چې د زودرا سیمه يې په نښه کړې وه د داعش څه درنې او سپکې وسلې هم لهمنځه وړې دي.
تر دې دمه د پېښې په اړه د داعش ډلې څه نه دي وېلي. داعش د ننگرهار په اچین او بټي کوټ ولسوالۍ کې له طالبانو او حکومت سره نښتې کوي.
